وعن كرة القدم احدثكم

......

بتنا نصطاد الفرح ونتفيأ ظلاله في عيون الأطفال..

بتنا نعلق آمالنا وأحلامنا على أكتفاهم الصغيرة..

نحملهم عبء وطن نحمله ونهرب منه..

ماذا الم يفز فريق مدني في بطولة ج؟؟

أتساءل عن هم زرعناه عندهم ليحصده من يحصد منهم..

ياللوجع الذي التمسته في عيون صغار قرروا ان يحولوه لفرح في دقيقتين..

ياللفرح الذي زخم به المدرج والاطفال ونحن هنا عبر الاسافير..

ياللفخر فقط في لعبة كروية تحمل اسم السودان موقعا بدموع أطفال..

اي بلد تحمل كل الحزن لتصطاد الفرح على مدرجات كرة وبين أرجل أطفال..

😢

😢

😢

...

عن بطولة قناة ج .. اخبركم..

فريق السودان يفوز هنا ليفرح ونفرح

وعن كرة القدم احدثكم

.........

ليه الفيسبوك والاسافير مقلوبة ب اطفال بطولة ج؟

ليه مكرهننا بيهم؟

ليه عملو شنو يعني؟

.....

تعالو اوريكم

لمن شافع يكون لابس علم السودان في قلبو..

يكون شايل هم لو رجع بيتو ومدرستو ح يكون امالهم اتحطمت فيهو

لمن السودان يكون بالنسبة ليهو اسم يختوهو جنب اسمو

لمن يكون راجع مكتح وزعلان لانو بس كورة.. ما هي بس كزرة ما شي تاني.. لكن اهلو خلوهو يسافر لل ما بس كورة دي ويقطع بحر ع قولة حبوبتي.. مامعروف اكل شنو اتغطى وللا لا.. نام وللا لا..

لمن شافع اقل من 15 سنة يكون نفسو نفففففسو مدرستو تكبر وياكل طعمية سمحة ويحلي بدقة وللا دادندرمة بتبيعها خالتو كبيرة جنب المدرسة لكن الحيطة مامكسورة.. والفصل عرشو ما مافي..

والكراس مامقطوع.. والمدرس ماغايب..

لمن شافع يكون شايل اسم البلد وح ينادوهو لقدام ده ما المثل السودان داك..

يبقى الشافع ده شيلناهو هم اكبر منو.. ختينا امل تحت كرعينو عشان بس اسم السودان الما بذكروهو الا في افقر عاصمة واوسخ عاصمة وافسد عاصمة.. يذكروهو في مدني الطلعت الشافع ده..

يبقى الشافع ده .. البكى وماعجبكم ده.. واتمخط واتريقتو عليهو ده.. يبقى بحب اهلو ومدرستو والسودان كرمز اكتر من كتار..

يبقى ما نبخس الحاجات ونقول ماهم عملو شنو..

انتو ديل عملتو شنو..

انتو ديل نفسكم ديل كان سليتو سكاكينكم عشان تغتالو الشفع ديل لو هم مافازو..

ارحمو وخلو رحمة الله تنزل.. لانو دموعهم دي معناتها في امل انو زول يحب السودان ك بلد ما ك قبيلة ولا حزب ولا جهوية..

يبقى زمتكم خلو الاسافير تضج بيهم وخلو حبة الفرح الاصطدناهو من كرعينهم ده يقعد معانا حبة..

نحن شعب بنفتش الفرح تفتيش ..

روقو

.....

حاجة كمان الدرس المفروض نتعلمو كلنا انو اليأس ماعندو مكان.. لمن شفع يورونا انو فرق دقيقتين بيصنع تغيير جذري يبقى حقو نقيف.. ونشوف التغيير العملناهو في حياتنا شنو.. هل قاتلنا عشان ام رويحتنا دي لو كان وظيفة او غسيل عدة زاتو او حتى تعليم خليكم من اي شي تاني.. هل غيرنا روحنا نحن؟؟

١٧ فبراير ٢٠١٦