....
مرات كدة بتحبط جدا..
وتتقفل في وشك ليه ماتقدر تعرف السبب..
أو يمكن تعرف السبب وتعمل رايح كدة..
مرات كدة بتحس إنو شباك الأمل مقفول..
وإنو باب الحلم بقى حيطة..
وإنو لو عندك حبة حب في قلبك ما بتلقاهو وإنت بحالتك الفوق دي زاتو..
بغض النظر إنو حب لحبيب أو صديق أو ناس بيتكم أو حب ساكت كدي بدون اي إنتماء..
يللا لمن تحبط خالص قدر ده يبقى أعرف إنها ح تتقفل زيادة ح تتقفل زيادة ماعندها حل تالت ..
وتعرف إنو ممكن تكسر الشباك وتعمل طاقة وبرضو شنو.. ما ح يجي ضو لأنك كسرت الشباك بالليل..
وإنو الحيطة الإنت من قبيييل قايلها باب دي ممكن تفضل كدة تنحت في المونة الحول الطوبة وبرضو ماتطلع لأنها مونة مسلحة مثلا..
يللا مرات بعد تتقفل كوووييييس كدة ده..
وتخت يعني مسطرينتك جنب الحيطة وتديها تكلة كدة ع الحيطة.. وتخت الإزميل والشاكوش جنب الشباك وتعمل غمران..
يعني بالضبط كدة لمن تتقفل وإنت تقتنع إنها إتقفلت خالص وماعندها أي طريقة تفتح تاني..
تقوم كدة..
فجأة كدة تكتشف إنو إنت بتنْحت في الحيطة القصاد الباب و أهو داك الباب مفتوح و إنت ماكنت شايفو لأنك مديهو ضهرك وشفتو لمّن قعدت إتّكلت ع الحيطة..
وتقوم تكتشف إنو الشباك ده أصلا مقفول من الله خلق الدنيا لأنو فاتح ع حيطة البيت الورانية وإنّو الشباك المفتوح عبارة عن طاقة لفوق كدة وماشفتو إلا لمّن جدعت الحاجات الفي يدك..
تكتشف إنو باب الأمل مفتوح وشباك الحلم واسع..
وممكن يكون الحلم باب والأمل شباك مافارقة ياخ.. المهم همّا في..
إنو نبضات قلبك بدت تنتظم بحب كدة ما عارفو إنت زاتو جا كيف ولمنو وعشان شنو..
المهم إنو في وقاعد حتى لو كان إنك حابّي إنك إنسان و بس..
......
حاول أحلم..
حاول ويمكن بكرة تكتشف إنو باب الحلم مفتوح..
٩ مايو ٢٠١٦