خمة نفس

......

مرات بتكون منتظر تسمع صوت معين في وقت معين...

مابتكون عايز أكتر من إنك تسمعو بس..

مش كدة؟؟

هممممممم..

طيب وإذا ماسمعت الصوت ده في الوقت المعينين الاتنين بتحس بكتمة نفس وعشراقة وخمة نفس زاتو وبتقرر تقوم تتنفس اااااه اااااوووووف ااااااااه اوووووف خمسة وتلاتين مرة ونص...

لأنو آخر مرة بتقول ااااااااااااه كدة ك شهيق وبتقوم تكتئب وتقفل معاك وتشلّت أم التلفون زاتو..

مش كدة؟؟

اهااااا ده تعوّد سموهو.. حب سموهو.. ريدة سموهو..

لكن لو ماسميتوهو بكون أحسن..

لأنّو لمّن نشيل الحاجات ونختّها في قالب كدة ونكسر رقبتها عشان تدخل القالب ده مرات ياخ القالب بتتمدد منو كدة زي أطراف الهايدرا بتاعة الأحياء الزمان ديك..

وممكن تقوم تنقسم إنقسام أميبي برضو زي أميبا زمان ديك..

اهاااااااا نبقى عاد في إنّو نحنّس الهايدرا تلم شعيراتها والأميبا تلم إنقساماتها؟؟

لالا عيب والله.. ما ببقى..

اهاااااا أظن لي أخير يا نجيب قالب هايدري/ أميبي النزعة والهوية والثقافة والأيدلوجية والمعتقد والمذهب ،؛ اي ديل كلهم كدة ده؛ وللّا كمان مانسمي الحاجات..

صوت عايز تسمعو.. نقطة سطر جديد..

أبقى مارق على خمة النفس ال ح تجيك غايتو

٤ أبريل ٢٠١٦