قيمة الزول بعد يفوت

.........

إحنا شعب بيعرف قيمة الزول بعد يفوت مننا..

بنتغنى بأمجاده ونخته في مصاف البشر الما بشر بعد يموت..

بنغفر أي شي وبنحاول نكفر عن إننا ماكنا معاهو في أزمتو ولا ساعدناهو ولا حفينا وراهو..

بهنس..

وردي..

أبو السيد..

الحوت..

الفيتوري..

الطيب صالح..

محجوب شريف

ناس بعد تمشي بنجي نفتش إنهم كانو شنو وعملو شنو ويارب مالنا ماشفناهم بعيوننا الهسه..

بنحاول نقول آسفين بإسلوب إنو ديل عايشين جوانا..

بس لمن كانو في مافي زول قبل عليهم..

غيرهم كتار شالو الكلمة شان الكلمة شرف الرب..

ختو خطاوي الريد في العينين وزرعو الفرحة في الإيدين..

وختو بصمة في أي جبين..

بس بعد مامشو فتشناهم..

زيهم كتار ..

في أي بيت ..

 لو أم لو أب لو أخ لو أخت لو صديق لو صديقة.. لو زول جارنا ساكت كدي..

بعد يموت بنجي نفكر إنو ماكنا جنبو لشنو.. ما سمعنا صوتو ليه..

.....

يبقى إذا قريب ليك زول حتى لو الناس شايفنو مامهم..

يبقى مهم شوفك إنت ليهو.. قلبك بحدثك بشنو معاهو..

يبقى تلملم سفنجتك الخدرا وتقبل تشوفو هو بي وين وتمشي تتونس معاهو أو تعاين ليهو ساكت..

لو الليلة هو في.. باكر مافي..

٣١ يناير ٢٠١٦