تعود

.....

عارفين لمن تتعودو على وجود زول في حياتكم؟

انو هو موجود دايما ح يمشي وين!!

انو ح تصحو الصباح اكيد ح تشوفوهو او تسمعو صوتو او بالميت كدة تقرو اسمو في تعليق او يضرب لايك في فيسبوك حتى..

عارفين لمن تتجاوزو حتة انو هو شنو كان بالنسبة ليكم وتكونو متعودين على انكم بس عارفينو موجود؟

طيب عارفين انو لو صحيت يوم الصباح وبمبدأ التعود ده زاتو ؛ قمتو لقيتو زولكم ده مافي ؛ لأي سبب من الاسباب: موت،زهج،قرف، تعود .. المهم مافي؛ ح تحسو بشنو؟؟

انا اوريكم..

ح تحسو :

انو ياخ بوصلتكم ختو جنبها مغنطيس كتير او سحبو مغنطيس العالم منها ففقدت اتجاهها..

انو الهواء الطبيعي البتاخدو منو اوكسجين بصورة عادية وطبيعية وآلية فجأة كدة بقى بس هواء مليان ثاني اكسيد كربون.. و ح تتخنقو ..

انو السماء لونها رمادي.. لالا؛ ماقنبجي ولا وردي ولا ازرق.. رمااااادية.. رمادية جدا.. الرمادي الماعندو لون..

انو الموية عندها طعم.. طعمها مر ولاذع..

انو الحياة مختلفة .. مختلفة جدا بانو في زول مافيها..

.....

يبقى زمتكم قبل ماتلقو ناسكم مافيشين.. عاينو وقلبو كدة في هواكم ومويتكم ودفاتركم و اي حاجة..

ماتتعودو على وجود زولكم لدرجة يكون الموية والهوا وهو حاجات طبيعية ومنطقية..

عشان قيمة الطبيعي بيعرفوهو المرضى بس..

عشان ماتلقو روحكم مرضى في الروح وماتعرفو تتعلاجو امسكو زولكم قوي..

ماتتعودو عليهو..

اوعكم

..

٢٩ أبريل ٢٠١٦