سودانويون

.....

أنا ضد إنت من وين أو قبيلتك شنو أو إنتماءك السياسي شنو أو جنسيتك شنو أو أهلك من وين أو أياً كان مسمى التصنيف..

ليه؟؟

عشان ده بيخلي الزول القدامك يصنفك في حتة وإطار معين..

يا قبلك يا رفضك و ده قبل أساساً ما تفتح خشمك لقدام..

عشان ده بعمق للعنصرية القبلية والجهوية..

المشكلة شنو إذا كنت سودانية بس ساكت كدة وفخورة بسودانيتي دي؟؟

كل زول فينا فخور بحتة إتربى فيها أو إتولد فيها .. وبحبها..

ليه؟؟

عشان هو مرتبط عاطفياً بناس فيها..

يبقى هو بحب الناس مش المكان زاتو..

يعني لو من الشرق أو الغرب أو الجنوب أو الشمال وأهلك أو أصحابك أو أحبابك ديل كانو من حتة تانية برضو كان حبيت الحتة التانية وإتعنصرت ليها..

يبقى ليه ماأكون سودانية بس؟؟..

بنتمي للسودان الوطن الواحد..

بإختلاف أعراقه وقبائله وعاداته وتقاليده وأعرافه..

بإختلاف سحنات أهله وألوانهم..

بإختلاف طبائعهم وتفكيرهم وإنتماءاتهم..

شنو المشكلة في إني مصرة إني سودانية بس؟؟

خلونا كلنا سودانيين بس وشوفو ح نتقبل بعض بسهولة كيف..

ماعشان ده ود قبيلتي ولا عشان ده ود حلتي ولا عشان دي بت مدرستي ولا عشان دي بت منطقتي..

لا ..

عشان القدامي ده بني آدم بيستاهل إني أتعامل معاهو كبني ادم بفكر وبفهم وبحس..

وللا شنو؟؟

٢٧ يناير ٢٠١٦