أهمية الوقت

- كتبت الانشاء؟

- أيوة والميس شالتها

- كتبت شنو؟

- كتبت المقدمة هي

- لا ماعايزة المقدمة هي.. عايزة نتونس عايزة أعرف فكرت قلت شنو

- كانت عن أهمية الوقت

- أهمية منو؟ ليكم انتو؟ 😨😨😨 اها وقلت شنو؟

- قلت المقدمة هي..

- لالا ماعايزة كدة.. طيب عاين.. إنت في رايك الوقت مهم ليه

- عشان ربنا ح يحاسبنا عليهو

- وتاني؟

- عشان الرسول ص قال مهم

- وتاني؟

- مامتذكر ياماما قلت شنو

- ياود أمي بقول ليك في رايك مهم ليه.. طيب إنت عارف حاجة؟ الوقت مهم.. إتخيل إنت هسه زول كبير كدة وشغال.. قمت صحيت يوم الصباح وقلت ماماشي الشغل ماعندي مزاج.. ورقدت نمت.. تاني يوم صحيت قلت اوووف ماماشي .. وبعدو وبعدو..شهر كااامل أبيت تمشي.. ونفترض إنت شغال

- شغال مهندس بكون ياماما مش؟

- ماضروري.. طبيب مهندس بتاع ورنيش المهم شغال؛ خليني أتم

- بتاع شنو؟

- خليني أتم.. طيب إذا مهندس وفي عمارة ح تقع مثلا وإنت ماجيت شفتها ال ح يحصل كتار ح يتضررو.. إذا طبيب وماجيت كتار ح يفضلو عيانين.. إذا اي شي ومامشيت كدة إنت ح تفتح الثلاجة بعد شهر تلقى الاكل كمل وتمشي البنك تلقى قروش ماعندك

- كدة ماحلو.. مافي fun

- في فن و أي شي.. ركز معاي .. نفترض إنت يوم 21 اكتوبر قررت ماتمشي.. هل ح يرجع 21 اكتوبر ده تاني عشان تغير رايك؟

- لا.. خلاص ح أمشي أشتغل ماعايز يكون مافي أكل..

- طيب يبقى مهم عشان اليوم البيمشي مابرجع وإنت ح تكبر..

- أيوة عايز أكبر عشان ماأمشي المدرسة..

.......

اهااا لحد هنا وأنا فقدت منطق

٣ نوفمبر ٢٠١٥