أبنوسية

......

قالت :

أبوي من الجنوب ..

أمي من الشمال

الكلام ده عرفتو لمن يوم أبوي مصر إنو نرجع الجنوب..

قال لأمي البلد دي عيشة ماعندي فيها.. وشغلي اهو ده براك شفتيهو طلعت منو..

عرفت إنو بيتنا الاوضتين وبرندة ده تاني ما ح اشوفو..

أمي بكت واتنخجت وهي بتودع في أهلها..

اختارت تمشي معانا.. ده طبعا لو قلت ليكم كان عندها خيار..

أبوي زاتو اختار يرجع ده لو كان عندو خيار..

عارفة لمن تكون حياتك ماشة بصورة معينة؟

جيرانك ومد الملح والبصلة بالحيطة؟

لعب للكورة في الشارع؟

مدرستك ولعب ام الحفر وكمبلا؟

ماف فرق بينك وبين القدرك لا لون لا شعر لا شكل لا لغة؟

عارفة زول يشيلوهو كدة يقلعوهو من حتة ويودوهو حتة تانية؟

ماكنت عارفة انو الوطن ياهو الناس..

البلد ياها الحولك ديل..

هم البخلو عندها طعم وعندها لون وعندها معنى اسمو وطن..

لحد هسه ماعارفة الفروقات بتاعة شمال وجنوب وشرق وغرب دي بتفرق في شنو بالنسبة للإنسان..

عارفة حاجة؟

أمي سألتها ليه عرست أبوي.. أبوي زاتو سألتو..

قالو لي مافكرنا نعرس ولاا مانعرس عشان فروقات لون وللا قبيلة وللا شنو ماعارفنو .. أول ماشفنا بعض قررنا انو ده زولنا..

عايزة أسألك بس: باقي الناس شايفين فرق بين بعض كيف؟

ابوي وامي ديل عندهم عمى ألوان؟ عمى ملمس؟ ده لو كان ملمس الشعر بتعرف بالعمى..

طيب عندهم عمى شنو ماشافوهو؟

إحنا ديل ذنبنا شنو ؟؟

....

ماعندي إجابات يا أبنوسية اللون والله.. وماأظن في زول عندو إجابة

١١ يوليو ٢٠١٦