أرض الخير

تصدح الأغنية:

أرض الخير افريقيا مكاني..زمن النور و العزة زماني

فيها جدودي...

جباهم عالية....

جباهم عالية..

جباهم عااالية

.....

ماما إحنا أفريقيين؟

- أيوة.. بفخر كدة قلتها

- طيب ليه بنتكلم عربي؟

- عشان إحنا عرب

- إفريقيين وللا عرب؟

- الاتنين.. قلتها بقطامة

دقيقة صمت..

جباهم عالية يعني شنو؟

- اسمك منو انتي؟

- إباء

- يعني شنو اسمك؟

- عزة وشمم

- بس هو بقول كدة

- بقول إنو ال فورهيد بتاعتنا هي اسمي؟ 😨

- لا 😵 بقول إنو هو فخور بإنو أفريقي عربي

- السوداني صعب مابفهمو 😢

... مارديت أنا نظام بسمع في الغنية 😑

.........

مواكب ما بتتراجع تاني

أقيف قدامها و أقول للدنيا أنا سوداني

.....

- يقيف قدام منو؟

- الناس يكلمهم

- كدة غلط طيب.. يطلع الشارع يقول هو سوداني ح يقولو مجنون؛ مواكب دي يعني ship or boat??

- لا ديك مراكب

سعيدة أنا إنو الموضوع إتحرف وقعدت أتكلم عن السمك😑😑

........

أنا إفريقي أنا سوداني

أنا بلدي..بلد الخير و الطيبة

أرض و خزاين..فيها جناين

نجومها عيون للخير بتعاين

.......

النجوم بتشوف منو؟

- هنا وقّفت الغنية..

حردتها عديل..

وإتكلمت عن السودان والنيل والبلد والأهرامات وكوش وسيدنا موسى زاتو دخلتو في القصة..

- الخير طيب هو سيدنا موسى؟

أنا: 😨😨😨

......

شغلت الغنية وغمرت بعد داك 😑😑

قمره بيضوي ما بغيب ابداً داايماً باين

نوره بيهدي ليالي حبيبة

عليها أغني و أقول للدنيا أنا سودااني

أنا افريقي أنا سوداني

شمسك طلعت و أشرق نورها بقت شمسين

شمس العزة و نورها الأكبر

هلّت شااامخة زي تاريخي قوية و رااسخة

ملت الدنيا و خيرنا بيكتر

خيرنا بيكتر

خيرنا بيكتر

شمس إيماني بأوطاني

دا الخلاني أقول للدنيا أنا سودااني

أنا افريقي.. أنا سوداني

٢٨ أكتوبر ٢٠١٥