- إنت عملت شنو لامن المستر قال عليك مهرجل؟
- ماعملت حاجة هو مالطيف كنت بضحك بس واحد عمل فني فيسس funny faces
- طيب عاين أنا فاهمة تماما إنك مضغوط ( لاحظو هو في سنة كم بس وأنا بقول مضغوط دي 😕)
وفاهمة تماما إنو بتجيك لحظات زهج وملل من كمية الحصص
- اأوة صاح ياماما هم سخيفين واللود load كبير
- أنا قربت أقول ياإبني في عمرك ما كنا بنقول كدة والا كان إتعلقنا في شجرة.. لكن بدل كدة قلت ليهو:
طيب عشان ماأكضب عليك أنا زاتي كنت بزهج من الحصص بس ماكنا بنضحك ع المستر وبنعمل funny faces لانو أساااسا ماكان عندنا مستر
- بدرسكم منو كان؟
- ياإبني ماتبقى انصرافي.. البنات بتدرسهم أستاذات والأولاد أساتذة
- إنتو كنتو كلو ناس براهم؟؟
- إتجاوزت السؤال تماما وواصلت:
طيب مرة مرة تطلع برة الموضوع ممكن بس ماتزهج المستر خليهو يخلص بعدين ألعب وللا أضحك عشان لازم نحترمو..
أنا كمان كنت بزهج وبطلع من الكلاس مرات
- كنتي بتطلعي؟ 😨
- اااااي .. بس مرات يعني لمن يكون الكلام معاد 😅.. ياإبني ركز معاي .. ده لمن الكلاس كان في الجامعة لأنو من حقك ماتحضر ولأنو عندنا أساتذة الواحد بقفل الباب في وشك
- كدة غلط لكن
- اي عارفة بس في أساتذة بيفتكرو إنو إنت ماجيت من قبيل يبقى يقفل الباب في وشك.. المهم اسمع كلام المستر.. ما ح أكضب عليك واقول ليك مامن حقك تزهج .. لأني قريت مدرسة زيك وفاهماك.. بس مامن حقك تقلل من إحترام المستر
- ولو كانت مس ممكن نلعب؟
- لا ياإبني لأنو مفروض إنت كولد تحترم البنات والمس بت
- لكن البنات بشاكلونا وبعملو لينا مشاكل وبكذبو
- ياإبني بنات كلاسكم ديل صغار مافاهمات لسة و مامن حقهم يعملو كدة
......
١٥ ديسمبر ٢٠١٥